The Thin Line (#4) – Your Vote, Church, and State Politics (?!)

11:32:33 PM | 5/8/2013| Wednesday

Minsan habang napasimba ako, narinig ko sa sermon ng isang pari ang tahasang pagkontra niya sa RH law (na isa pa lang panukala na’t tawag nun ay RH Bill) noon. Narinig ko pa ito sa ibang mga misa sa iba’t ibang mga simbahan sa mga nagdaang linggo. Lumala pa yata noong naipasa ang itinuring nilang RH Bill. Naging tila mas subjektibo ang panghuhusga.

Teka, wala sanang masama, dahil tayo naman ay nasa pagiging demokratikong bansa. Kaso…

Akala ko ba may separation of the church and state? E bakit nakikialam pa rin sila sa mga pangayayari sa ating gobyerno, lalo na’t nalalapit na ang panahon ng midterm elections?

Akala ko rin e.

At uso pa rin ba talaga ang “separation of the church and state?” Lalo na’t may isang senatoribale na tahsaang kumokontra at hindi kumikilala dito. Akala ko ba ay ginagalang ng isang mambabatas ang Saligang-Batas? E bakit ‘to, hindi yata? Sabagay, opinion niya yun e. Kaso, anak ng pating naman, ang batas ay batas, at dahil pa ri’y sundan. Ayan sa hindi kakasunod natin, kaya tayo nakatengga sa kinalulugaran natin magmula noong nakalya tayo sa diktadurya e.

Mantakin mo ha? Kaliwa’t kanan ang paghayag nila ng mga manok nila na kandidato sa darating na eleksyon. Endorso dito, batikos doon. May Team Patay at Team Buhay pa nga na ginawa ang isang simbahan sa kabisayaan e. Tumutukoy ito sa mga kandidato na susuportahan nila at dapat na suportahan ng tao sa darating na halalan. At siyempre, sa kabilang banda may batikos na parte ang simbahan ukol diyan – at ito ay pumputakte sa Team Patay, ang mga tao na hindi dapat iboto sa darating na eleksyon nang dahil sa tumulong sila na maipasa ang reproductive health law.

Ganun? Ang babaw yata ng dating nito ha?

Pero may block voting man na magaganap o wala, ano ba talaga ang signipikasyon ng mga ‘to? Nagsisilbi lang sila bilang mga gabay sa mga botante sa darating na eleksyon. Okay sana e. Kaso, dalawang bagay lang: gaano nito maapektuhan ang pagboto ng mga mamamayan sa national level?; At labas na dapat sa usaping pulitikal ang simbahan, e bakit pa rin sila nakikialam?

Ayon sa isang artikulo na may kinalaman sa pag-regain ng kapangyarihan ng Simbahan sa Pulitika ng bansa, magmula pa nga noong panahon ng pananakop ng mga Espnayol ay nagkaroon ng matinding kapangyarihan ang Simbahan dito sa bansa. Sobrang tindi lang niyan, naimpluwensyahan na ng mga prayle noon ang aspetong pulitikal ng mga mananakop. Kabilang na d’yan ang pagbuwag sa rehimeng Marcos noong 1986 sa pamamagitan ng People Power, at isama mo na rin pala ang kaumtikan nang hindi pagpasa ng Rizal Law noong dekada ’50. Kinontra ng simbahan ang panukala na ito noon dahil sinu-sino ba ang kinalaban ni Rizal, (pati na rin ng ibang rebolusyonaryo)?

Ayon kay Edna Co, isang political scientist, "There is a line drawn between your faith and a social issue: that is how a lot of Filipino Catholics think." Aniya, matitinong nilalang pa rin naman ang mga Pilipino kahit hindi sila ganun ka-obedient sa mga turo ng Simbahan.

Don’t get me wrong. Isa rin akong Katoliko, nagdarasal at nagsisimba pa rin. Pero kung may mga bagay na papakialaman at iimpluwensyahan ng Simbahan ang mga pampulitikang pananaw ng mga nananampalataya na tulad ko at tulad namin, lalo na’t may umiiral sa ating Saligang-Batas na “separation of the church and the state,” e hindi na yata tama yun. Tila misleading ang nagaganap ‘pag nagkataon.

Nakapagtataka lang. Pagpalain kayo nawa.

Sources:

http://ph.news.yahoo.com/catholic-church-seeks-regain-power-philippines-044144674.html

author: slickmaster | © 2013 september twenty-eight productions